අරුමැසි පෙම

හැරගියා නොවෙයි ඔබ
හැර යන තැනට මා
නොතැකුවා මතකයි මා

මොහොතකින් මොහොත
නාද වන දුරකථනයට
නිහඬය, සිත
කියන්නට නොහැකි ව
මා නිදහස් වූ බව
ඔබේ ප්‍රේමයේ දෘඪ බැම්මෙන්

කියන්නට නොහැකිව
පිදූ ප්‍රේමයට පමණක්
ප්‍රේම කරන බව
ඔබට වඩා.......

"අධ්‍යාපනය සමඟ අධ්‍යාත්මය"

වර්ෂ 2010ක් වූ ඔක්තොම්බර් 28 වූ අද දින කඳාන සාන්ත සෙබස්තියන් මහා විද්‍යාලයේ යැදුම් මැදුර උත්සවාකාරයෙන් විවෘත කෙරිණි.(යැදුම් මැදුරක් යනු කතෝලික ආගමික පාසල් තුළ සිසුන්ට යාච්ඤාව සහ ආගමික වතාවත් තුළින් තම අධ්‍යාත්මය දියුණු කරලීමට සාදන කුඩා දෙව්මැදුරකි.) මේ සඳහා කොළඹ පදවි  අගරදගුරු අති උතුම් මැල්කම් කාදිනල් රන්ජිත් හිමිපාණෝ සහභාගී වූහ. එතුමා කාදිනල් ධූරය හිමි වීමෙන් පසු පාසලකට පැමිණි පළමු අවස්ථාව මෙය විය. මෙහිදී එතුමා විසින් පාසලේ යැදුම් මැදුරෙහි ප්‍රථම වරට දිව්‍ය පූජාව පතවනු ලැබූ අතර එහිදී දරුවන්ගේ අධ්‍යාපනයත් සමඟ අධ්‍යාත්මය වැඩි දියුණු කළ යුතු බවට එතුමා පැවසීය. තවදුරටත් පාසල ඇමතූ එතුමා රටට වැඩදායි දරුවන් පිරිසක් බිහි කීරීමට පාසල් මාතාවට හැකි වේවායි සුභාශිංශන එක් කළේය. එසේම විද්‍යාලයේ "සාරධර්ම යාය 2010" පොත් කළඹද අද දින එතුමාට පිළිගැන්වීය.

ජය මග

දරාගෙන වඟකීම්
සිප් සතර බෙදන්නට
පෙර පිනක් ලැබී ඇති
උතුම් ගුරු සේවාව

ඉවසීම, කරුණාව, මෛත්‍රිය
ප්‍රගුණ කර
ලබාගෙන පන්නරය
ගැටළු විසඳාගන්න

මාවතක් සකස් කර
ගමන නිවැරදි කරන
කියාදෙමු දරුවනට
ජීවිතේ ජය ගන්න

නැවත එමි

නුදුටු මා බෝලයයි                                     පිත්තයි
නො ඇසූ හැංගිමුත්තම්                                  හඬයි

නොකළ කොම්පිට්ටුයි පොල්පිති               ගොනයි
ඇසුරු කළ බෝ මුලයි පොත්                         ගුලයි

ගත වැඩි සිප්සතර                                        පිරීයයි
හතර වරිගයම මා නිසා                            නිවන්යයි

ලෙඩ ඇ‍ඳේ පියාණන්                              අසරණයි
සොයුරු කැල සිප් සතර                             අනාථයි‍‍

මා මෑණි මුළු දවස කඳුළු                                බොයි
සමුගනිමි හිමියනේ මා සිතත්                    අසරණයි

ගුරු සුවඳ

සබඳ අප හමුවෙලා

දොඩමළුව සැනසුණා

තුටු සිතක් නොමැති බව 

තව දිනක හෙළි කළා

විඳවන්න ඇත තවත් බෝ දුරක්... දුෂ්කරය...

සුවඳ ඇති මල් අතර

විෂ ඇවුණු මල් කැකුළු පොඩිවෙලා හැකිලිලා

නොහැකි යැයි කරන්නට විකසිත

පවරමුද දොස දස දෙසට

නැත සබඳ

මහා සවියක් ලෙසින් දිස්වෙන

දසුනක් ඇත අප සතුව

නොසිතේ ද ඒ.. ගැන

වන්නට හැකිනම් ශිඛර කලාවක්

දැඩි හිරු රශ්මිය මුද කර පොවනට

ගුඟුලැල්ලක සිසිලස ගෙන දේනම්

මුඩු වී ගිය ඒ හිස් බිම් කතරට

අතුකොළ එළමින් පොහොර සදන්නට මහා රුකක් වී අසල රැ‍‍ඳෙන්නම්

සුවඳ සඟව ගත් පෙති විකසිත වී

රේණු පිරි පැණි බිඳු බේරෙන්නට

ඉඩක් නැතැයි පවසුනු හැකි කාහට

පිනි ඉසිණු මල් කැකුළු පිබිදෙන්න ඇත ඉඩක්

සුවඳවත් මල් ටිකක් මැදට වී තුටු සිතින්

ගැයෙන නිබ ඳව ම ප්‍රශස්තියේ මිහිර

පරයනවා සබඳ නැවුම් මල් සුවඳකින්

පිබිදෙන් නොහැකි වී පොඩිවෙලා ඇකිලිලා

ගිලිහෙන්න තිබූ මල්

නොදැනේවි ද?... අසීමිත සතුටක්

සබඳ අපි සමුගනිමු...

නිමේෂයක එක් දනක

හෙළමු සැනසුම් සුසුම්... දිගු විරාමයකට...
෴

ආචාරිනී දයා

සා. සෙබස්තියන් මහා විද්‍යාලය

කඳාන

ජීවිතේ මගේ C + L = A වැනි

ජීවිතේ  මගේ  C + L = A වැනි...

අකුරු තුනකින් සැදුණු සමීකරණයකින් ඇරඹුණු මා ඉන්පසු ගෙන ගියේ මූලික පොත් වෙතටය

එයින් නොනැවතුණු මා ඉන්පසු ගෙන ගියේ අවසාන ගිණුම් වෙතය. ලැබුනේ ශුද්ධ අලාභයකි.

ඇරඹුවෙමි වැරදි නිවැරදි කිරීමේ ගිණුම, ඵලක් නෑ තවත් ලැබුනේ ශූද්ධ අලාභයකි...

රොෂැන්ක වෙරන්ජන්

"ළමා ලොව එළිය කරන්නට එක්වෙමු සැම දනා"

අද ක්‍රි.ව 2010ක් වූ වප් මස පළමු වැනිදාය. තවත් විදියකට කිව්වොත් අද ලෝක ළමා දිනයයි! පාසලක් විදියට එය සැවොම එකතු වී අනිවාර්යෙන්ම සමරන උත්සවයකි. ශ්‍රී ලංකාවේ අපි ලෝක ළමා දිනය අද වැනි දවසක සමරන්නෙමු. නමුත් විවිධ රටවලට අනුව මේ දිනය වෙනස් වේ. අපේ අසල් වැසි ඉන්දියාව ලෝක ළමා දිනය සමරන්නේ නොවැම්බර් දහසතර වැනිදාය. ඒ වගේම එක්සත් ජාතීන්ගේ සංවිධානයට අනුව එය නොවැම්බර් මස විසි වැනිදාය. කවුරු කෙසේ මොන දිනයේ සැමරුවත් එය ළමා දිනයමයි. එසේම අනිත් අතින් ගත් විට අද ශ්‍රී ලංකාව තුළ වැඩිහිටි දිනයද සැමරේ. ඒ නිසා ළමා පරපුරද වැඩිහිටි පරපුරද එකට එක්වන දිනයක් වේ.

සම්මතය අනුව අවුරුදු දහ අටට අඩු ඕනෑම පුද්ගලයෙක් ළමයෙක් වේ. නමුත් දරුවකු අවුරුදු දහහතරේ සිට මේ ළමා අවදිය අවසන් කරමින් වැඩිහිටිබාවය කරා වර්ධනය වීම සිදු වේ. ඉතින් ළමයි වශයෙන් මේ දේ අප කාටත් පොදු කරුණකි. නිසි කලදී ළමාවියත් වැඩිහිටි වියත් ගත කිරීමට අපට අනිවාර්යෙන්ම සිදු වේ. නූතන සමාජය තුළ ළමයාට එල්ල වන ප්‍රධානම අභියෝගය ළමාකම ආරක්ෂා කර ගැනීමයි. නියමිත වයසටත් පෙර ළමයාට වැඩිහිටිබාවය ලබාදීම සමාජය විසින් නොදැනුවත්ව හෝ දැනුවත්ව සිදු වේ. මෙහි ඇති වැරැද්ද වනුයේ වැඩිහිටි අවදියක් ගත කිරීමට තරම් ළමයා පරිපූර්ණත්වයකට පත්ව නොතිබීමයි! මල් කැකුළකට දැඩි උණුසුම ලැබීමෙන් එය පිපෙන්නටත් පෙර පරව යයි. නමුත් මල් කැකුළකට එය උරුම නොවිය යුතු දෙයකි. මක්නිසාදයත් එය පිපී දිලෙන්නටත් එහි සුවඳ විහිඳුවන්නටත් එම කැකුළට අවස්ථාව හිමි විය යුතු නිසායි. ඉතින් එසේ ළමයෙක් තුළින් නිසි කලදී ශික්ෂිත තාරුණ්‍යයක් බිහි කරලීමට වැඩිහිටි සියලු දෙනාගේ මඟ පෙන්වීම නොමඳව අවශ්‍ය වේ. ඉතින් වැඩිහිටි දිනය සමරන වැඩිහිටි ඔබ සැමට එම යුතුකම මෙසේ කාරුණිකව මතක් කර දෙමු!

සුභ ලෝක ළමා දිනයක් වේවා!

ආයුබෝවන්!

කඳාන සාන්ත සෙබස්තියන් විද්‍යාලීය විසින් පවත්වාගෙන යන  බ්ලොග් අඩවියට ඔබ සැම ගෞරවයෙන් යුතුව පිළිගනු ලබනවා. අපේ පාසලේ සිසුන්ගේ නිර්මාණශීල්තවයට ඉඩහසර ලබාදීම මෙම බ්ලොග් අඩවියේ ප්‍රධාන අරමුණයි.  ඒ තුළින් අපේ පාසලේ දැනුම හා නිර්මාණශීලිත්වයට සයිබර් අවකාශය තුළ වටිනාමක් එක් කිරීමට අපට හැකි වනු ඇත.